ភ្នំពេញ៖ បុរសម្នាក់បានដើរទៅមើលមងជាមួយគេក៏ជ្រុលធ្លាក់រណ្តៅទឹកជ្រៅ ហើយត្រូវបានអ្នកស្គាល់ជួយស្រង់ដែរ តែជាអកុសលជនរងគ្រោះបានស្លាប់បាត់ទៅហើយ បង្កឲ្យមានការភ្ញាក់ផ្អើលកាលពីវេលាម៉ោង៤រសៀលថ្ងៃទី២៣ខែតុលាឆ្នាំ២០២៤ នៅអូជិតវត្តភ្នៀតសិម្ពលី ដែលស្ថិតនៅភូមិអង្គរជ័យ សង្កាត់ស្នោ ខណ្ឌកំបូល រាជធានីភ្នំពេញ ។
សពមានឈ្មោះ ស្រួច ស្រស់ ភេទប្រុស អាយុ៥៣ឆ្នាំ មុខរបរនៅផ្ទះ រស់នៅភូមិកុលកោះស្នារ សង្កាត់ស្នោ ខណ្ឌកំបូលរាជធានីភ្នំពេញ ។
តាមប្រភពពត៌មានពីបុរសម្នាក់ឈ្មោះគង់ សំអឿន ដែលឃើញហេតុការណ៍ បាននិយាយប្រាប់ថា នៅមុនពេលកើតហេតុ ជនរងគ្រោះបានមកតាមគាត់ដើម្បីទៅមើលមង ហើយទីតាំងខាងលើមានរណ្តៅជ្រៅនៅជិតផ្លូវ ខណៈពេលគាត់កំពុងដើរមើលលមង ជនរងគ្រោះបានដើរចុះមើល ជាមួយគាត់ដែរដោយនៅឆ្ងាយពីគ្នាចម្ងាយប្រមាណជាង១០០ម៉ែត្រ ។
ប្រភពដដែលបានបន្តទៀតថា ខណៈពេលម្ចាស់កំពុងដើរមើល ចំណែកជនរងគ្រោះដើរជិតដល់រណ្តៅជ្រៅនៅជិតផ្លូវទំនប់ដែលទើបជីកថ្មី ក៏ស្រាប់តែបាត់ជនរងគ្រោះមិនឃើញ។គាត់ខំស្រែកហៅតែមិនឮជនរងគ្រោះឆ្លើយតប ហើយនៅជិតនោះមានអ្នកដាក់មងនៅក្បែរដែរ តែពេលសួរនាំទៅគេថាមិនបានឃើញជនរងគ្រោះ ទើបមានការសង្ស័យបាននាំគ្នាដើររកមើល ហើយក៏ប្រទះឃើញជនរងគ្រោះបានលង់ទឹកស្លាប់បាត់ទៅហើយ ក៏នាំគ្នាលើកជនរងគ្រោះដាក់លើផ្លូវទំនប់ដើម្បីធ្វើចលនា តែជាអកុសលទោះជួយសង្គ្រោះបឋមយ៉ាងណាក៏មិនអាចជួយជនរងគ្រោះបានដែរ ។ភ្លាមៗនោះបានទាក់ទងទៅសាច់ញាតិនិងក្រុមគ្រួសារជនរងគ្រោះមកដល់កន្លែងកើតហេតុ និងបានទាក់ទងទៅសមត្ថកិច្ចនគរបាលប៉ុស្តិ៍ជាបន្តបន្ទាប់ ។
ប្រភពពត៌មានពីក្រុមគ្រួសារជនរងគ្រោះបាននិយាយប្រាប់ថា ជនរងគ្រោះមានសតិមិនប្រក្រតី តែងតែមកមើលមងជាមួយបុរសម្នាក់ឈ្មោះគង់ សំអឿន ខាងលើជាញឹកញាប់ផងដែរ តែធ្វើម្តេចព្រោះគាត់ជាមនុស្សមានសតិមិនប្រក្រតី ។
បន្ទាប់ពីកម្លាំសមត្ថកិច្ចនគរបាលប៉ុស្តិ៍បានមកដល់ ឃើញហេតុការណ៍ខាងលើ សមត្ថកិច្ចនគរបាលប៉ុស្តិ៍បានទាក់ទងទៅសមត្ថកិច្ចនគរបាលជំនាញកោសលវិច័យរាជធានីភ្នំពេញដើម្បីមកពិនិត្យសពខាងលើភ្លាមៗ ហើយជំនាញបានបញ្ជាក់ប្រាប់ថា ជនរងគ្រោះស្លាប់ដោយសារលង់ទឹកពិតប្រាកដមែន ហើយសមត្ថកិច្ចនគរបាលប៉ុស្តិ៍បានធ្វើលិខិតប្រគល់សពឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕
